Anither Inconvenient Truth

Anither Inconvenient Truth 

A wunner hoo mony o’ ye hae herd o' a film caa'd 'An Inconvenient Truth' aboot tha former United States Vice President Al Gore's campaign tae edyecate folk aboot global wermin'. It wus yin o' tha maist successful films o' twa thoosan an seiven. It won twa Academy awerds an is use’t aroon tha wurld tae edyecate weans.

Stillanaw iver faftie percent o' Amerikans dinnae believe in tha idea o' global wermin'.

A suppose thur's sum folk hoo jist cannae bae edyecated. Wether it's tae mitch boather, oor jist plain thranness, thur jist naw willin' tae appen thur mind tae tha truth, even an undeniable yin. Aff coorse thur's aye thon wi an interest in hidin' tha truth. Pooerfu organisations hoo profit fae tha ignorance o' ithers.

Ay, A can sympathise wi Mr Gore fer oor ain leid haes becum anither yin o' thon inconvenient truths. Tha Ulster-Scots people alang wi thur culture an language hae bin aroon fer iver fower hunner year. Yet accordin' tae twathry creeters, wi access tae a keyboord, bit no tha Internet it wud seem, tha Ulster-Scots language is a racent invention.

Hoo the' managed tae ignore tha screeds o' evidence tae tha contary is beyon’t me. A’m dumfoonthered es tae hoo tha fail’t tae cum acroass wurks sitch es tha poems o’ tha weaver poets published in Irish newspapers throughoot tha late seiventeen hunners oor tha popular scrievens o' W. G. Lyttle in tha nineteenth century, aa o' whuch haes bin republished in tha last wheen o' years.

An a wee skelly oan tha internet wull inform oanyin aboot tha humorous an at times poignant buks o' Archibald McIlroy, sitch es, 'When Lint was in the Bell' (1897) an 'The Auld Meetin Hoose Green'. (1898).

Ay, aa o' tha abine ir fill't wi tha hamely tongue, wi oor ain undeniable leid. Efter aa hoo dae ye think I learn’t tae spell aa thon Ulster-Scots wurds. Tae oanyboady hoo haes a notion tae scrieve in tha hamely tongue oor if yer jist lukkin’ tae fin oot mere aboot tha Ulster-Scots ye can gan tae, http://lowcountrylad.blogspot.co.uk/2012/10/anither-inconvient-truth-links.html